17-anyos gilugos sa ig-agaw

CEBU, Philippines — Giunay og lugos ang 17-anyos sa iyang 37-anyos nga ig-agaw sa Lungsod sa Pinamungajan niadtong Domingo sa kaadlawon.

Sigun sa Women and Children’s Desk sa Pinamungajan Police Station, Police Officer 1 Therese Bellones kinsa mao sab ang nagkupot sa kaso, nga niadtong Sabado sa gabii nagtapok ang mga paryente sa usa ka panimalay aron magselebrar sa kapistahan.

Matud pa nga base sa gisumbong sa biktima nga nag-inom og ilimnong makahubog ang suspek uban sa ilang mga paryente apan sa dihang nagkalawom ang kagabhion dungan sa nagkalami nga inom, nahutdan na sila og ilimnon.

Tungod niini, nasugoan ang suspek nga maoy mopalit sa usa ka tindahan sakay sa motorsiklo.

Tungod sa ka daghan sa botelya, gipakuyog ang biktima aron maoy mosabak sa mga paliton nga ilimnon.

Pag-abot sa tindahan, giingong sirado na hinungdan nga nilahos sila sa sunod nga sitio diin sirado na sab ang mga tindahan.

Nakurat na lang ang dalagita nga gihagad siya sa iyang ig-agaw nga mangadto og lodge sa sunod nga baryo apan nagdumili siya hinungdan nga nasuko ang suspek ug kalit siya nga gibira niini.

“Giguyod gyud kuno siya sa kasagbutan. Nangasamad gud ang iyang tiil. Mao to nga nadaug gyud siya sa suspek kay dako man sad tong tawo ang suspek. Na-rape gyud siya,” matud ni Bellones.

Human sa hitabo giingong gihulga sa suspek ang biktima nga dili mosumbong.

Pagpamauli sa duha, wala na ang mga kainom sa suspek ug maoy namatikdan sa iyaan sa biktima nga may mga garas nga unang gituohan nga nadisgrasya sa motor.

Lunes na nisumbong ang biktima ngadto sa inahan hinungdan sa ilang pagdangop sa kapolisan ug gidakop ang suspek.

Nasuta sa examination nga positibong nahilabtan ang biktima hinungdan nga napasaka ang kasong pagpanglugos batok sa suspek. (BANAT NEWS)