Napulo ka lungsod mopadala og emergency responders

CEBU, Philippines — Ang mga responders gikan sa 10 ka mga local government units motabang sa Dakbayan sa Sugbo pagbantay lakip na pagresponde kon adunay emerhensiya nga mahitabo atol sa pagsaulog sa Pista Senyor ug Sinulog 2018.

Upat  ka mga local disaster offices ang mo-deploy sa ilang mga personnel sa Devotee City sa dakbayan kon diin di momenus 3,000 ka mga dayong deboto ang mopuyo tungod sa pista.

Sugod karong adlawa, i-deploy ang mga local disaster officers sa lungsod sa Liloan sa Devotee City, samtang ugmang adlawa mao ang mga responders sa dakbayan sa Danao samtang mga responders na usab sa San Fernando ini’g ka Biyernes ug ini’g ka Lunes mao ang mga personnel sa LDRRM sa lungsod sa Argao.

Samtang ang mga responders gikan sa unom ka mga local disaster offices sa Medellin, Tabogon, Barili, Dumanjug, Sibonga ug dakbayan sa Toledo motabang pagbantay sa fluvial procession ug foot procession ini’g ka Sabado ug ingon man sa Sinulog Grand Parade ini’g ka Domingo.

Matud ni Rhee Telen sa PDRRMO sa pagkakaron 10 pa lang ka LGUs ang nikompirmar nga mo-deploy og personnel gikan sa local disaster offices niini.

Bisan sila sa PDRRMO motabang usab sa pagresponde kon adunay emergency nga mahitabo sa usa ka semana nga kalihokan alang sa kapistahan ni Senyor Sto. Niño ug ingon man sa Sinulog karong tuiga. (BANAT NEWS)