Banat ( Leaderboard Top ), pagematch: 1, sectionmatch: 1

Tatay Jun Cortes gilubong na

CEBU, Philippines — Hingpit na nga gihatud sa katapusang kapahulayan ang konsehal sa Dakbayan sa Mandaue, Demetrio “Tatay Jun” Cortes Jr., sa ilang family mausoleum sa Mandaue Municipal Cemetery. Kini human sa alas 3 sa hapon nga Requiem Mass nga gipahigayon sa National Shrine of Saint Joseph sa Barangay Centro sa maong dakbayan.

Ang necrological service sa iyang haya sa ilang karaang panimalay sa Barangay Centro niadtong Biyernes gitambongan sa mga higala, mga sakop sa ilang pamilya ug mga opisyal sa kagamhanan sa dakbayan.

Naglakip sa nibisita sa iyang haya ang opisyal sa kagamhanan sa Lalawigan sa   Sugbo nga gipangulohan ni Gobernador Hilario Davide III.

Sa nasayran si Cortes namatay sa pangedaron nga 66-anyos sa usa ka pribadong tambalanan sa Dakbayan sa Mandaue niadtong Disyembre 28 sa alas 4 sa hapon tungod sa chronic kidney disease.

Sa nasayran nga si Cortes gawas nga nagserbisyo sulod sa tulo ka termino isip sakop sa konseho, nakaserbisyo kini kaniadto isip bise mayor sa panahon ni anhing mayor Alfredo “Pedong” Ouano sa tuig 1980’s.

Siya sab ang numero unong konsehal sa dakbayan ubos sa kasamtangang administrasyon ni Mayor Gabriel Luis “Luigi” Quisumbing ug anaa na unta sa ikatulo ug katapusang termino isip konsehal.

Siya igsuon ni kanhi mayor ug karon Kongresista Jonas Cortes. (BANAT NEWS)

 

  • Follow Us: