Mga dalan palibot sa basilica pasirad-an unyang gabii

CEBU, Philippines — Sirad-an sa Cebu City Transportation Office (CCTO) sugod alas 10 karong gabii ang dalan palibot sa Basilica Minore del Sto. Niño isip pagpangandam sa unang adlaw sa nobenaryo subay na sa kapistahan sa Balaang Bata Señor Sto. Niño.

Matud sa Operation’s Head sa CCTO Francisco “Isko” Ouano, base sa nasabutan ang drop- off point anha sa may Cebu City Hall, pick-up point sa may dalan Legaspi, Entrance ug Exit niadtong magsakyanan.

Gipasabot ni Ouano, gisayo nila ang pagsira sa dalan aron buntag sa Enero 11 mahibawo na ang mga tawo nga adunay road closure ug masayod na sila kon asa moagi ug mo-park sa ilang mga sakyanan.

Ang mga tawo mahimong mo-park sa mga sakyanan diha sa Compania Maritima, Plaza Independencia ingon man sa kining mga pay parking.

Kadtong mga molapas sa lagda sa trapiko bisan pa man sa advisory nga gipagawas sa maong buhatan adunay silot nga ipahamtang sama sa pag-clamp sa sakyanan ug isyuhan sila og citation tickets.

Ang Department of Health-7 mopatuman usab og Code White diin tanang mga emergency team ug tambalanan nakaalerto atol sa pagsugod sa nobenaryo matud pang Regional Director Jaime Bernadas sa Banat News.

Sumala pa ni Bernadas, atol sa ipahigayon nga Walk with Jesus pagbukas sa nobenaryo mao usab ang pagsugod sa code white.

Giawhag ni Bernadas ang katawhan nga likayan ang pagpataka og kaon sa mga baligya sa kadalanan ilabi na kung wala sila masayod sa pagpreparar niini.

Nanawagan usab si Bernadas ngadto sa mga ginikanan nga dili na lang dad-on ang ilang mga anak ug sa mga edaran na sa mga dapit nga magdasok ang mga tawo kay dili na sila makasugakod. (FREEMAN)