Tulo ka dagkong proyekto ma-highlight sa charter day

CEBU, Philippines — Tulo ka mga dagkong proyekto maoy magsilbing highlight sa kasaulogan sa charter day sa dakbayan sa Talisay karong petsa 12.

Kini mao ang paghuman sa merkado sa Tabunok maoy unang ipakita ni Mayor Eduardo Gullas ngadto sa Talisaynon kon diin mahuman na gyud karong semanaha.

Si City Engineer Gamaliel Vicente Jr. nibutyag nga gipaspasan na gyud sa kontraktor ang maong proyekto subay sa ilang saad.

Ang Tuanson Construction nga gipanag-iya ni Engr. Ricardo Tuanson maoy kontraktor sa merkado sa Tabunok.

Samtang ang technical vocational school nga mao ang Lagtang Market kaniadto nahuman na sab aron gamiton sa mga tinun-an sa lain-laing kurso.

Tulo ka lawak saringan ang magamit sa mga tinun-an nga mahimo na dayun nilang mapuslan. Nigasto ang siyudad og usa ka milyon ka pesos aron sa pagtarong sa lawak human gipapahawa ang mga nagpuyo sa lugar.

Lakip sa gipaabot nga ipasigarbo sa mayor mao ang katukoran sa Youth Homes sa mga menor de edad nga nahimutang sa kilid sa Talisay City Jail sa Barangay Maghaway sa maong dakbayan.

Gihulagway si Vicente nga sa tanang proyekto sa mayor ang merkado sa Tabunok gyud maoy daghang giagiang kalisod apan nahuwasan sila sa ilang kabalaka nga dili mahuman tungod kay napakita man gyud sa kontraktor ang ilang trabaho. Gipahibalo usab nga walay klase ug trabaho sa petsa 12 sa dakbayan sa Talisay tungod sa maong selebrasyon. (BANAT NEWS)