Krimen sa Toledo mikunhod

CEBU, Philippines — Nikunhod ang ihap sa krimen nga natala  karong tuiga kon itandi sa nakalabay nga tuig sa Siyudad sa Toledo.

Kini ang gibutyag ni Police Superintendent Anthony Bagarinao, hepe sa Toledo City Police.

Base sa ilang talaan, gikan sa buwan sa Enero hangtud Disyembre, adunay pagkunhod sa krimen sa maong dakbayan.

Sa nakalabay nga tuig adunay 41 ka insidente sa krimen ang ilang natala matag buwan. Itandi karong tuiga nga adunay 32 ka insidente ang ilang natala sa krimen matag buwan.

Aduna kini pagkunhod nga 17.89 porsiyento.

Ang maong mga krimen naglangkob sa pagpatay, rape, pagpangawat, pagpanunggab ug pagpanulis.

Gikalipay ni Bagarinao ang maong kalamboan diin sulod pa lamang sa lima ka buwan ang iyang pagserbisyo sa Toledo.

Dako usab ang iyang pasalamat sa iyang ginsakpan nga mga polis kay bisan anaa lamang sa 55 ka PNP personnel ang Toledo, naningkamot gyud kini nga maubsan ang krimen sa siyudad.

Giawhag usab sa hepe ang katawhan sa Toledo nga makigtambayayong kanila  aron sa pagsumpo o pagpakgang sa krimen sa dakbayan.

Gani ilang gilusad ang Toledo City Police Text Hotline nga 09954719737 diin mahimong mo-report ang katawhan sa mga panghitabo sa ilang dapit sa Toledo. Subay niini, gipaneguro ni Bagarinao nga maatiman ang mga sumbong nga ilang madawat. (BANAT NEWS)