‘Same sex marriage’ gisupak

CEBU, Philippines — Supak ang kadagkuan sa simbahan ug layko sa same sex marriage bisan pabor niini si Presidente Rodrigo Duterte.

Matud ni Fe Barino, pangulo sa Commission on the Laity sa Archdiocese of Cebu, nga sa tinuoray lang ang katawhan walay kontrol unsay isulti ug buhaton sa presidente.

Apan isip pangulo sa layko mas angayan palig-onon pa ang pagpahinumdum sa katawhan mahitungod sa pagtulun-an nga gihatag sa simbahan.

Sumala pa ni Barino nga angayan barugan ang kamatuoran nga anaa sa Bibliya nga ang kaminyoon para lang sa mga babaye ug lalaki.

Dugang pa ni Barino nga bisan unsa pa ang balaud nga ipatuman sa gobiyerno, dili makausab ug makatupong sa balaud sa Ginoo nga maoy labaw sa tanang gahum.

Gitug-an ni Barino nga padayonon lang gyud ang pagtudlo ug pagsunod sa balaud sa Ginoo aron dili matumpawak sa kadaut ug ilakip sa pag-ampo ang presidente ug mga tinugyanan sa gobiyerno nga malamdagan sa panghunahuna.

Samtang si Dr. Rene Bullecer nipadayag nga kinahanglan nga moluwat og pamahayag ang bag-ong presidente sa Catholic Bishops Conference of the Philippine tungod kay usa kini ka direkta nga pagpangataki sa relihiyong Katoliko.

Matud ni Bullecer nga ang pamahayag ni Duterte usa ka senyales sa ka insensitivity niini ngadto sa 75 porsiyento nga Pinoy nga gibunyagan nga Katoliko.

Ang Arsobispo sa Sugbo, Jose Palma, nitug-an nga dili mahimo ang same sex marriage tungod kay ang gitugot sa simbahan ug sa Bibliya mao ang kaminyoon lang sa babaye ug lalaki. (BANAT NEWS)