Mamaligya’g bino sa rota sa Sinulog, dakpon

CEBU, Philippines — Gipahimangnuan ang mga establisemento duol sa rota sa Sinulog, nga dili na lang gyud mosuway og pagpamaligya og ilimnong makahubog atol sa Sinulog Grand Parade kay dili magpanuko ang mayor sa pagpasira niini kon masakpan nga nisupak sa gipatuman nga liquor ban.

Gipahibawo ni Cebu City Mayor Tomas Osmeña nga kadtong masakpan nga nisupak sa gipatuman nga lagda, pasirad-an ang establisemento sulod sa unom ka buwan.

Sigon sa mayor nga wala nay rason nga mangita pa og lusot ang mga masakpan kay sayo nga nihatag og pahimangno ang siyudad mahitungod niini.

Giklaro ni Osmeña nga dili siya interesado sa multa kay gihatagan niya og importansiya ang pagmentinar sa kahapsay ug kalinaw.

“I’m not interested in the fine, I’m interested in maintaining order and in order to maintain order there has to be an element of fear. I don’t want anyone to be punished basta I’m just telling them. Basta if you get caught, we’ll close you for six months so do you feel lucky,” sigon sa mayor.

Ang Sinulog Grand Parade mahitabo karong Enero 21, 2018, adlaw’ng Domingo ug mao sab ang adlaw nga ipatuman ang liquor ban.

Samtang, gisugdan na kagahapon sa Division for the Welfare of the Urban Poor (DWUP) ang registrasyon sa mga maninda sa umaabot nga Sinulog.

Matud ni DWUP Operation head Genevieve Alcoseba, Disyembre 18, 19, 20, 27, 28 ug 29 ra ang ilang registration ug mangayo siya og dispensa sa mga dili na makaparehistro. Kini tungod kay karong Enero, magsugod na sila og susi sa mga pwesto sa mga nagparehistro kon mahimo ba kining kabutangan sa ilang mga paninda.

Dugang ni Alcoseba, nga ilang ipatawag ang mga nakaparehistro human sa ilang ocular visit kay kinahanglan pa nilang mobayad aron mahatag og official receipt kon diin ilakip usab ang ilang temporary approval aron mapamatud-ang tinuod ang ilang permit. Lakip nilang bayran ang laminated identification cards ug ID sling.

Nasayran nga ang kantidad sa mabayran sa vendors, magdepende sa produkto nga ilang ipamaligya.

Sumala usab ni Alcoseba nga color-coded ang mga ID sling sa mga manindahay aron dili sila makahimo og balhin sa laing pwesto. Sila bantayan sa mga taga DWUP ingon man mga polis ug tanod nga anaa madestino sa kadalanan.

Subay niini, matud ni Mayor Osmeña, nga ang mga mobile vendor nga namaligya og clear bottled water, dili na kinahanglang mobayad og permit kay kinahanglanon gyud sa mga tawo ang tubig nga mainom atol sa kasaulogan sa Sinulog. (BANAT NEWS)