Hospital sa Malabuyoc adunay bag-ong building
CEBU, Philippines — Laing edipisyo ang gibuksan sa mga opisyal sa Kapitolyo sa usa sa mga tambalanan nga gidumala sa Probinsiya sa Sugbo sa Lungsod sa Malabuyoc.
Ang 2-story building sa Mariano Jesus Cuenco Memorial District Hospital sa Malabuyoc gi-inugurahan kini nga gipangulohan ni Gobernador Hilario Davide III ug Bise Gobernador Agnes Magpale niadtong Martes.
Ang maong building ang ika-tulo nga gibuksan sa Kapitolyo pinaagi sa Provincial Health Office (PHO) ug Department of Health (DOH-7) karong tuiga.
Unang gibuksan ang bag-ong emergency building sa district hospital sa lungsod sa Pinamungajan niadtong Septiyembre ug gisundan sa 50-bed nga edipisyo sa provincial hospital sa Balamban.
Ang maong pasilidad gibutangan kini og mga bag-ong ekipo sa diagnostic testing ug maka-accommodate og 50 ka pasyente apil na niini ang adunay sakit sa tuberculosis ug animal bite.
Matud ni Davide III nga magamit ang maong edipisyo sa mga pasyente sa kalungsuran nga layo ang pagbiyahe padulong sa Dakbayan sa Sugbo aron magpatambal.
“I hope that with this new building, better health services could be provided to the people, especially the poor patients,” matud ni Davide.
Nitambong sa inauguration ang pangulo sa PHO nga si Dr. Rene Catan ug mga chief of hospitals lakip na ang mga opisyal sa munisipyo sa Malabuyoc ug sa Samboan. (BANAT NEWS)
- Latest
