Patay’ng lawas napalgan sa katunggan
CEBU, Philippines — Patay nga lawas sa usa ka babaye ang napalgan niadtong Huwebes alas 2 sa hapon sa Sitio Little Hawaii, Barangay Cogon-Pardo, Dakbayan sa Sugbo.
Si Danilo Abellanosa, mananagat sa maong lugar, ang nakakita sa patay nga lawas sa lapok nga bahin sa katunggan samtang paingon siya managat.
Dali nga nangayo og tabang si Abellanosa sa barangay tanod sa ilang lugar ug kini ang ni-report ngadto sa kapolisan.
Dali sab niresponde sila si SPO2 Wetzel Berry ug mga kauban sa lugar.
Gibanabana nga anaa sa 60-anyos ang pangedaron sa lawas ug posibleng nalumos kini tungod kay walay nakitang samad sa lawas.
Si Mary Mabalato, residente sa maong lugar, ang giingong nakakita pa sa babaye nga buhi pa nga naglakaw-lakaw kini ug nagdala og botelya sa tubig alas 8 sa buntag sa maong adlaw.
Ang patay nga lawas anaa gipahimutang sa Super Jepoy Memorial Homes. (BANAT NEWS)
- Latest
