Nabakunahan na-dengue luwas na

CEBU, Philippines — Nakagawas na sa tambalanan ang 10-anyos nga batang lalaki nga naturukan og Dengvaxia ug natakbuyan og dengue.

Si Jenny Ababon, taga Lawaan 3, Dakbayan sa Talisay ug inahan sa bata nga si Jujen Ababon, nibutyag nga niadtong Domingo sila nakagawas gikan sa pribadong tambalanan ug nibalik sila kagahapon sa buntag aron sa pag-monitor sa iyang bata.

Ang inahan niangkon nga grabeng kabalaka ang iyang nabati sa dihang nahibaw-an sa mga balita labot sa giturok sa iyang bata diin naigo pa gyud sa dengue.

Sa pagkakaron wala pa gyud sila mokompiyansa sa kahimtang sa iyang bata ug dili kini palabihan og kahago.

Si Jujen nga nahinabi sa mga tigbalita niingon nga bisan pa man og nasakit siya og dengue, wala magluya ang iyang lawas apan gihilanat lang gyud siya.

Si Jujen nauli na sa ilang panimaye ug wala na gibati og labad sa ulo.

Ang nabayran sa pamilyang Ababon sa tambalanan niabot sa P26 mil nga hinuwaman gikan sa amo sa amahan.

Matud ni Jenny nga gisaaran sila sa kagamhanan sa Siyudad sa Talisay nga hatagan og P10 mil isip tabang.

Ang Department of Health nipahibawo sa pamilyang Ababon nga sila ang motapal sa ilang nabayran sa tambalanan apan giproseso pa lang gyud ang tanang papeles.

Ang amahan sa bata nga si Jhonry Ababon nitug-an nga grabe gyud ang iyang kaguol ug kahadlok dihang gi-dengue ang iyang bata ug nisamot sa dihang nadunggan ang dili maayo nga epekto sa Dengvaxia.

Siya nitataw nga kun aduna pay bati nga nahitabo sa iyang anak, pursigido siya nga mopasaka og kaso sa nagbakuna niini.

Iyang awhag sa gobiyerno nga unta sa sunod ilang segurohon ang ilang himoon nga pagbakuna sa mga bata. (BANAT NEWS)