Santo Niño moduaw sa hospital, prisohan

CEBU, Philippines — Mahatagan og higayon ang mga masakiton ingon man ang mga piniriso ug mga minor offenders nga makapangamuyo ug makahikap sa imahen sa Balaang Bata nga si Señor Santo Niño.

Gibutyag ni Konsehal Dave Tumulak, executive committee chairman sa Sinulog 2018, nga karong Disyembre 17 ang imahen mobisita sa Vicente Sotto Memorial Medical Center hangtud sa petsa 19, Martes, sa udto.

Sa samang adlaw ibalhin kini sa Cebu City Medical Center (CCMC) ug magpundo kini gikan sa Martes hangtud sa Huwebes, Disyembre 21.

Tumong niini nga ang mga pasyente ug ilang pamilya makaampo ingon man ang mga doktor ug ubang medical staffs dunay Divine intervention nga makaayo sila sa mga masakiton.

Gawas sa mga tambalanan, bisitahon sab sa Balaang Bata ang Cebu City Jail Male ug Female Dormitory ug ang Operation Second Chance.

Sa Enero 9, gikan sa Basilica del Santo Niño ang Balaang Bata moagi sa Barangay Guadalupe tungas sa Kalunasan paingon sa Operation Second Chance diin usa ka Santos nga Misa ang himoon ug hatagan ang mga bata ug ang ilang pamilya nga makaampo sa Balaang Bata.

Alas 5:30 sa hapon ibalhin kini sa Female Dormitory ug laing Santos nga Misa ang himoon ug hatagan og oras sa pag-ampo ang mga piniriso.

Alas 7 sa gabii sa samang adlaw, ang imahen ibalhin sa Male Dormitory sa Cebu City Jail alang sa jail personnel.

Sa Enero 10, adlaw’ng Miyerkules, sayo sa buntag dunay prosesyon sa matag selda sa mga piniriso ug sa alas 9 sa buntag sa samang adlaw hatagan og higayon ang pamilya sa mga piniriso.

Sa pagka-udto, usa ka send-off mass ang himoon aron ibalik ang imahen sa Basilica.

“Wala man gud na silay opportunity lagi to pay respect especially prayer, unya dili sila ka candle lighting, ikalipay gyud ni sa mga patients, sa mga relatives, hospital personnel, sa BJMP because even though they are detained, they are confined sa hospital, they are entitled also to pay respect to Señor Santo Niño,” matud ni Tumulak. (BANAT NEWS)