Pagkaon sa Family Day lutoon sulod sa CPDRC
CEBU, Philippines — Gipahibawo sa acting jail warden sa Cebu Provincial Detention and Rehabilitation Center (CPDRC) nga dili kinahanglan magdala og pagkaon ang mga dalaw sa mga piniriso atol sa Family Day karong Disyembre 25 ug 26.
Hinoon walay overnight stay sa mga dalaw nga mahitabo sa maong okasyon sumala pa ni Audesti Miguel.
Matud ni Miguel nga ang mga piniriso na mismo ang moluto sa pagkaon alang sa ilang dalaw isip pagsaulog sa adlaw sa Pasko.
Sa inisyal nila nga kasabutan, matud ni Miguel nga sanglit aduna may organisasyon ang mga piniriso, kini na ang magsabot kung unsay iandam atol sa duha ka adlaw nga Family Day.
Sumala pa nga pinaagi niini walay pag-ila kung kinsa ang datu ug pobre nga piniriso ug ang tanan mokaon kung unsay giandam nga pagkaon.
“So in the true spirit of Christmas, don’t you think it’s far more Christian to treat people equally whether you are rich or poor you come in, you got served with the same food, you got served the same food that’s been eating by the rich,” matud ni Miguel kinsa nitataw nga hisgutan pa kini sa kooperatiba sa mga piniriso.
Pag-abot sa regalo, sumala pa niya nga angay nga magdala og regalo nga dali ra inspeksiyonon sa mga nagbantay.
Ang CPDRC motugot og tulo ka bisita matag piniriso nga bahinon sa duha ka adlaw o depende sa makaya sa security matag usa ka adlaw pagseguro nga walay makalusot nga kontrabando.
Gibanabana nga moabot sa kapin 9,000 ang mobisita sa CPDRC atol sa Family Day kung basehan ang 3,634 ka piniriso karon sa provincial jail.
Ang Family Day ipahigayon sulod sa quadrangle sa CPDRC apan dili paagian ang mga ganghaan padulong sa mga selda.
Samtang ang mga babayeng piniriso adto kini magsaulog sa Family Day sa ikaduhang andana sa CPDRC.
Si Gobernador Hilario Davide III nagkanayon nga iya na nga gimanduan si Miguel nga magsuwat sa Cebu Provincial Police Office alang sa dugang personnel nga motabang pagbantay. (BANAT NEWS)
- Latest
