Tindahan duol sa Mandaue CH way permit
CEBU, Philippines — Gimando ni Mandaue City Mayor Gabriel Luis “Luigi” Quisumbing ang pagsirado sa usa ka establisemento nga nahimutang dili layo sa City Hall tungod sa kapakyas sa pagbaton og business permit.
Si Quisumbing niingon nga gipirmahan na niya ang closure order sa 7–Eleven outlet sa niagi pang semana. Matud sa mayor nga nasagmuyo siya sa nagdumala sa maong establisemento kay nagpahimutang pa gyud og mga lamesa bisan anaa na sa karsada nga gisirado atubangan sa City Hall.
Dugang pa niya nga nakadawat sab siya og taho gikan sa iyang higala nga nag-asoy nga gitanyagan kini og babaye dihang nipalit siya sa maong establisemento.
Laing taho nga iyang nadawat mao nga adunay establisemento nga panahon sa gabii nagbutang pa gyod og banda nga nagtukar hangtud sa pasado na sa tungang gabii. (BANAT NEWS)
- Latest
