Retired general bag-ong hepe sa CT-TODA
CEBU, Philippines — Retiradong heneral mao ang bag-ong gipadumala sa traffic operations sa Dakbayan sa Talisay. Gipakuptan na ni Talisay City Mayor Eduardo Gullas ang pagduma sa City of Talisay-Traffic Operation Development Authority (CT-TODA) ngadto kang Retired General Cecil Sandalo karon lang semanaha.
Kini human makita sa mayor nga wala’y kausaban ang dagan sa trapiko sa Barangay Tabunok nga kanunay’ng gisaway sa katawhan.
Lakip nga tahas ni Sandalo mao ang task force sa paghawan sa sidewalk vendors.
“Ako siyang giingnan nga you have the authority to hire and fire any of those enforcers who will not follow the orders including them,” nagkanayon si Gullas.
Siya nagtuo nga pinaagi ni Sandalo nga tawong isog, hayan kahadlokan ug tuohan siya aron aduna na gyu’y kausaban sa dagan sa trapiko sa dakbayan.
Asoy pa ni Gullas nga gihimo na og sugod ang estrikto nga pagpatuman sa dagan sa trapiko sa lugar, gani subli nilang gipatuman ang truck ban.
Si Sandalo mao ang consultant ni Gullas sa peace and order. Siya nagkanayon nga upat ka aspeto ang nakahatag og trapik sa Tabunok mao ang kagamay sa karsada, daghang mga sakyanan, sidewalk vendors ug parkingan sa mga traysikol.
Dugang ni Sandalo nga ang malapason sa balaud sa trapiko, ilang isyuhan og Temporary Operator’s Permit (TOP) human sila makig-alayon sa kapolisan. Iyang gipaningkamotan nga mahatagan og kalambuan ang iyang pagdumala sa maong buhatan. (BANAT NEWS)
- Latest
