District hospitals kuwang sa tawo

CEBU, Philippines — Niangkon ang pangulo sa Provincial Health Office nga ang kakuwang sa mga tawo sa mga tambalanan sa Probinsya sa Sugbo maoy hinungdan nga dili dayon maatiman ang pipila ka pasyente.

Apan sumala pa ni Dr. Rene Catan, hepe sa PHO, nga wala magpabaya ang mga medical personnel sa 16 ka provincial ug district hospitals sa mga pasyente ug gipaneguro niini nga kahibawo ang mga medical staff sa mga angay nga unahon atimanon.

“Kung nag-lapse mi sa among serbisyo, it’s not because it’s really our intention nagtamad-tamad diha, that is not the intention of any health worker in any hospital, but tungod lang nagkataon nga busy, unmanned or undermanned ang hospital,” matud ni Catan. Si Catan nagkanayon nga posibleng wala masigo sa gipaabot nga serbisyo sa pasyente ang nahitabo sa Cebu Provincial Hospital- Balamban hinungdan nga nasuko kini sa nurse.

“Very professional man ni atong mga staff, we know pud unsay kinahanglan tan-awon dayon, we have been trained to identify what are really emergencies,” matud ni Catan.

Si Catan niangkon nga daghan sila nadawat nga reklamo sa mga tambalanan apan nitataw nga naninguha sila nga molambo ang serbisyo sa mga hospital.

Matud niya nga nahimong interesado ang hitabo sa Balamban hospital tungod kay nahimong viral ang video nga kuha sa insidente diin niabot na sa pisikal ang pagreklamo sa magtiayon tungod sa giingong wala dayon naatiman ang ilang pasyente. Si Catan nagkanayon nga daghan nadawat nga reklamo ang mga personnel sa mga hospital apan dili maayo kun moabot na sa verbal ug physical abuse.

Sa pagkakaron matud ni Catan nga dili na sila mokomento pa sa maong kaso apan nitataw nga mosuporta sila sa ilang empleyado.

Sumala pa ni Catan nga hagit karon sa mga provincial ug district hospitals nga magdugang pa og mga medical personnel sama sa nurse, medical technologist, pharmacist ug doctors aron nga dili kuwang ang mga moatiman sa mga pasyente ilabina nga nag-upgrade sila sa mga hospital. (BANAT NEWS)