P3M gasto sa Kabkaban Festival

CEBU, Philippines — Gitapos sa usa ka hugyaw nga fireworks display nga nilanat og dul-an sa 6-minutos ang ika-16 ka tuig nga Kabkaban Festival sa Dakbayan sa Carcar diin dul-an sa P3 milyones ang budget niini sa kagamhanan.

Napulo ka tunghaan nga gilangkuban sa Valencia Vocational High School, Tal-ot National High School, Ocaña NHS, Perrelos NHS, Liburon NHS, Carcar Central Night NHS, Can-asujan NHS, Tuyom NHS, Roberto E. Sato Memorial NHS, ug Maximino Noel Memorial NHS, ang nagtigi alang sa premyo.

Matud ni Junjet Primor, chairman sa board of judges, nga nagkadugay ang Kabkaban nagkanindot ang performance diin silang mga judges ang naglisud gyud sa pagpili sa mga mananaug.

Ilang gisuta ang naay klaro nga mensahe sa ilang sayaw ilabi na aduna silay mga gipasidunggan nga mga tawo ug lakip usab sa kalimpyo sa ilang mga sayaw nga walay sayop.

Sumala pa ni Primor nga ang mga mananaug sa best in costume mao ang Can-asujan NHS.

Sa best in street dancing, una ang Ocaña NHS, ikaduha ang Roberto E. Sato Memorial NHS ug ikatulo ang Tuyom NHS.

Sa best in ritual showdown, una ang Liburon NHS, ikaduha ang Roberto E. Sato Memorial NHS ug ikatulo ang Ocaña NHS.

Sa best choreographer si Rolando Monto, Jr. sa Liburon NHS.

Ang Liburon NHS nipasidungog sa usa ka mananambal kinsa maoy naghatag og pasidungog sa ilang lugar sa dihang daghan kini nga naalim nga mga masakiton nga moabot sa panimalay niini.

Ang grand champion nakadawat og P20,000; first runner-up P15,000; second runner-up P10,000 sa ritual showdown samtang sa street dancing, P10,000; P7,000 ug P5,000.

Ang best choreographer nakadawat og P5,000 ug P10,000 sa best in costume.

Si Mayor Nicepuro Apura sa iyang bahin nitug-an nga ni level-up na gyud ang performance sa mga dancers base usab sa suporta nga gihatag sa kagamhanan ilabi na ngadto sa mga choreographers nga mopaubos sa mga training ug seminars aron molambo pa sila ug aduna usab silay ayuda nga gihatag nga P130,000 matag contingent aron aduna silay magamit sa ilang mga panginahanglanon.

Malaumon ang mayor nga sa umaabot nga katuigan tanan na gyud barangay sa dakbayan ang moapil sa maong kalihukan diin sa pagkakaron dili mominus sa P3 milyones ang ilang gigahin.

Malampuson ug malinawon nga gitapos ang Kabkaban Festival 2017 nga gitambungan sa liboan ka katawhan. (BANAT NEWS)