Kanhi konsehal naghikog
CEBU, Philippines — Naghikog patay ang usa ka kanhi barangay kagawad human sa panag-away nila sa iyang hinigugma diha sa Purok Nangka, Barangay Upper Poblacion, lungsod sa Pilar.
Alas-6 sa buntag napalgan nga nagbitay sa kusina ug wala nay kinabuhi si Anthony Galano, 28, residente sa maong dapit.
Sumala pa sa imbestigador sa maong kaso nga si PO1 Ruben Aguilar posibleng kaadlawon pa kini naghikog.
Butyag ni Aguilar nga taud-taod nang mi-resign si Galano pagkakonsehal sa barangay ug wala kini koneksyon sa pagpakamatay niini.
Nadiskubrehan sa mga polis nga nag-away ang konsehal ug ang walo na ka tuig niining karelasyon nga taga Inupakan, Leyte nga gibisita niini niadtong Biyernes.
Sa pag-uli niini niadtong Domingo matud pa ni Aguilar nga daw namatikdan sa mga kabanay nga aduna kini problema nga gisagubang.
“Ni-text kuno ang babaye ngadto sa igsuon nga pabantayan si Anthony kay nagplano kining maghikog,” si Aguilar miingon. (BANAT NEWS)
- Latest