PNA motabang sa nurse sa viral video
CEBU, Philippines — Ang Philippine Nurses Association (PNA) mipasalig nga motabang sa kaso sa nurse nga si Liezel Sewane, kadtong nurse sa Balamban District Hospital nga nakuha sa video footage nga gikalalis ug susama og gidagmalan sa lalaking kauban sa pasyenteng nakiglalis kaniya.
Sa pagpakighinabi sa Banat News kang Liezel, siya mipadayag sa iyang kalipay sa paspas nga pag-aksyon sa PNA sa iyang kaso.
“Nigaan-gaan gyud akong paminaw nga naay ni-assure nga motabang nako, “ sigon pa niya.
Ang PNA pagkadawat sa report bahin sa maong insidente daling nakigkita kang Liezel kauban ang chief nurse sa maong hospital kagahapon aron susihon ang maong panghitabo.
“Nag-assess sila og unsa gyo’y nahitabo atong adlawa,” dugang niya.
Si Sewane mibutyag sa Banat News nga dili usa siya mopagawas og daghang statement hangtod dili niya makaestorya ang iyang abogado.
Sa pagkakaron, on-leave si Sewane isip nurse sa Cebu Provincial Hospital- Balamban ug gi-adjust pa ang schedule niini alang sa iyang seguridad.
Kahinumdoman nga nag -viral ang video nga nagpakita sa pagyawyaw sa usa ka hamtong nga babayeng pasyente ngadto kang Liezel tungod sa pagkadismaya niini sa ilang pagserbisyo.
Human niini, miduol ang usa ka lalaki nga gikatahong bana sa maong pasyente nga mibira sa ID sa nurse. Sa video, wala makita ang pagbira apan mas makita nga midanguyngoy og hilak ang nurse human sa pagduol sa lalaki nga daw adunay gikab-ot diha sa iyang lamesa.
Pipila sa mga netizens ang wala makauyon sa gibuhat ngadto sa nurse, usa kanila si Carl Dave Ang nga mi-post og: “Pwede ra man unta storyahon, nganong naabot pa man gyod sa pisikalay.”
Dul-an nuwebe mil ang mikomento og “sad” ug “angry” reactions karon sa maong video ug halos usa na ka milyon ang “views” niini. Ang anak pasyente sa post niini sa Facebook miklaro nga wala dapati sa ilang amahan ang nurse kondili gikab-ot ra ang iyang ID kay di niini gusto ihatag ug matud pa nabuhat nila kadto tungod kay wala sila atimana og tarong. - /IBM) (BANAT NEWS)
- Latest
