Way klase atol sa piyesta sa opon

CEBU, Philippines — Wala’y klase sa mga tunghaang publiko sa elementarya ug high school sa Dakbayan sa Lapu-Lapu atol sa kapistahan sa Birhen sa Regla karong Nobiyembre 20 ug 21.

Si Department of Education (DepEd) Schools Division Superintendent Marilyn Andales maoy nagpahibawo ngadto sa mga principal sa mga publikong tunghaan sa dakbayan.

Hinuon ang mga pribadong tunghaan sa dakbayan ang gihatagan lang sila og ilang kaugalingong paghukom kung magklase ba o dili atol sa duha ka adlaw nga kapistahan.

Ang tumong ni Andales nga wala’y klase sa maong duha ka adlaw nga kapistahan sa Birhen sa Regla alang usab sa pagpakighiusa sa mga tinun-an ngadto sa ilang mga sakop sa pamilya sa maong kasaulogan.

Sa maong adlaw sa kasaulogan maoy masinati ang mga kausaban sa dagan sa mga sakyanan nga magpadulong sa Barangay Poblacion diin nahimutang ang simbahan sa  Birhen sa Regla. Naglakip sa mga sakyanan nga dili makalahos sa pag-agi sa mga dalan nga nagpaingon sa Barangay Poblacion mao ang mga traysikol ug makahimo lang sila pagpasakay sa ilang pasahero sa giila nga mga terminal.

Gidili usab ang pagsulod sa mga sakyanan nga pasaheroan paingon sa mga dalan sa Barangay Poblacion.

Giawhag usab ang adunay mga sakyanan nga dili magpataka og parking aron kalikayan nga dili kini maguyod sa towing truck ug makabayad na hinuon og multa sa mahimo niining kalapasan. (BANAT NEWS)