Dul-an 1,000 gi-drug test, way positibo
CEBU, Philippines — Walay positibo sa paggamit og ilegal nga drugas sa 924 ka kawani sa gobiyerno sa lima ka lungsod sa Lalawigan sa Sugbo atol sa gihimong drug test sa Cebu Provincial Anti-Drug Abuse Office (CPADAO).
Sukad niadtong Nobiyembre 7 hangtud 14, nipahigayon og drug test ang CPADAO sa mga empleyado sa lungsod, kapolisan, magtutudlo ug mga empleyado sa hospital sa probinsya.
Niadtong Nobiyembre 7, 20 ka personnel sa Lungsod sa Alegria ang gipaubos sa drug test, 146 usab ang sa Lungsod sa Santander apil na niini ang mga magtutudlo ug empleyado sa munisipyo niadtong Nobiyembre 8.
Sa Nobiyembre 9, 546 ka opisyal sa baranggay uban ang kapolisan, bombero ug mga magtutudlo ang gipaubos sa drug test sa Lungsod sa Compostela.
Pagka-sunod adlaw ang 54 ka medical personnel sa Badian District Hospital ug niadtong Nobiyembre 14 ang 148 ka empleyado sa Balamban Provincial Hospital ang gi-drug test.
Ang tanang kawani, matud ni Carmen Remedios Durano-Meca kinsa maoy hepe sa CPADAO, walay positibo ang resulta.
Si Meca nalipay sa resulta sa drug test ug nagkanayon nga magpadayon ang ilang pagpahigayon niini subay sa drug-free workplace program sa gobiyerno pagseguro nga walay empleyado nga nalambigit sa ilegal nga drugas. (BANAT NEWS)
- Latest
