Duha ka heneral sa AFP moretiro
CEBU, Philippines — Moretiro na sa katapusan niining tuiga ang duha ka heneral sa Armed Forces of the Philippines.
Si Lt. General Oscar Lactao, commander sa AFP Central Command, moretiro na karong Disyembre dungan-dungan sa bag-o lang nilingkod nga si AFP Chief-of-Staff, General Rey Leonardo Guerrero kinsa natudlo niadtong Oktubre 25.
Giisip ni Lactao nga kadaugan sa CentCom ang pagpakgang sa armadong grupong Abu Sayyaf sa Bohol samtang kapildehan ang mga sundawo nga nakabsan sa kinabuhi atol sa maong binakbakay.
"I am proud that I belong from the committed personnel of AFP-CentCom," matud ni Lactao.
Ipahigayon ang ceremonial turnover karong Disyembre 8 apan wala pa masuta kun kinsa ang mohulip kaniya sa iyang biyaan nga posisyon.
Si Guerrero nipahalipay na kang Lactao sa pagbisita niini sa Sugbo sa niaging adlaw sa mga kalampusan niini nga malinawon ang Kabisay-an.
Samtang wala pa sab mahibaw-i ni Guerrero kun kinsa ang mohulip sa iyang biyaang pwesto.
Apan sigun pa niya nga andam siya kung lugwayan ni Presidente Rodrigo Duterte ang iyang pagserbisyo.
Pulos gikan sa Philippine Military Academy (PMA) Maharlika Class of 1984 ang duha ka heneral. (BANAT NEWS)
- Latest
