Banat ( Leaderboard Top ), pagematch: 1, sectionmatch: 1

‘Black parade’ karong Sabado

CEBU, Philippines — Pag-edukar sa kabatan-onan mahitungod sa dautang epekto sa ginadiling drugas ang tutukan sa Cebu City Office for Substance Abuse Prevention (COSAP) atol sa Drug Awareness Week sugod karong Nobiyembre 18.

Ang selebrasyon adunay tema nga, “The Horrors of Illegal Drugs and Impact to Families and Communities.”

Matud sa executive director sa COSAP, Garry Lao, nga ang kabatan-onan ang kasagaran nga matintal sa maong bisyo tungod sa kamausisahon sa pangutok sa mga batan-on karon.

Adunay Black Parade nga ipahigayon sa COSAP karong Nobiyembre 18 atol sa opisyal nga pagbukas sa Drug Awareness Week.

Kini salmutan sa 80 ka barangay sa dakbayan, mga empleyado sa City Hall, tinun-an sa high school, ug uban pang buhatan sa gobiyerno.

Tanang mosalmot sa parade magsuot og kolor nga itom aron magsimbolo sa kahadlok kung ang usa ka tawo mosuway sa ginadiling drugas labi na ang kabatan-onan.

Apil sa selebrasyon ang mga room to room forum, film ug slogan making contest nga salmutan sa mga tinun-an.

Ang mapiling slogan ang gamiton sa COSAP sa pagpadayun sa programa batok sa droga.

“A drug-free community is the safest place to be,” matud ni Lao atol sa 888 News Forum sa Marco Polo Plaza kagahapon. (BANAT NEWS)

  • Follow Us: