Radaza babagan sa PDP-LABAN

CEBU, Philippines — Giprotestahan sa mga opisyal sa Partido Demokratiko Pilipino-Lakas ng Bayan (PDP-Laban) sa Dakbayan sa Lapu-Lapu ang pagpasakop nilang Mayor Paz Radaza ug 11 ka konsehal sa partido.

Usa ka manifesto ang gipadala ngadto kang Senate President ug PDP-Laban president Aquilino “Koko” Pimentel III, regional chairman ug karon Undersecretary Noel Felongco sa Department of Environment and Natural Resources ug House Speaker Pantaleon Alvarez.

Kini gipirmahan nilang city chairman, Engr. Rolando Patalinjug; vice chairman, Dr. Celedonio Sitoy ug mga opisyal nga sila si Maria Fe Imbong, Celectino Aying, Ernesto Tumulak, Jose Vicente dela Serna, Cesario Silawan, Carlito Sabalones Jr., Rufo Bering ug Atty. Dave Godornes.

Sila nidagan ubos sa PDP-Laban sa niaging eleksiyon apan nangapilde sa grupo ni Radaza kinsa ubos sa Liberal Party kinsa ang tanan nidaug.

Si Patalinjug nidagan sa pagka-mayor, si Sitoy sa pagka-kongresista ug ang walo nidagan sa pagka-konsehal.

Ang manifesto giluwatan human nasayri sa grupo nga si Radaza ug kaubanan ang nakahural isip mga sakop sa PDP-Laban kang Alvarez.

Matud nila nga nakuratan na lang sila nga si Radaza ug kaubanan gidawat sa PDP-Laban nga wala’y pagtugot nilang mga opisyal sa partido sa siyudad ug wala gani niagi og Basic Membership Seminar nga usa sa gikinahanglan una pa ang usa dawaton sa partido.

Kagahapon ang PDP-Laban adunay BMS nga gipahigayon sa Opao Gym sa Dakbayan sa Mandaue nga gipasiugdahan sa provincial chairman nga si Nixon “Jojo” Dizon nga gisalmutan sa 1,800 ka tawo isip pasiuna sa gikatakdang mass oath-taking karong Biyernes sa South Road Properties sa Dakbayan sa Sugbo.

Gibutyag sa manifesto ang mga kaso nga nalambigitan ni Radaza ug ang pagkasuspenso niini.

Ila sab gihulagway nga “political butterfly” si Radaza diin sa 2010 ug 2013 sakop kini sa Lakas-Kampi ug LP sa 2016.

Giingong wala gani mohatag og permit si Radaza sa rally ni Presidente Rodrigo Duterte sa paglansar niini niadtong Marso 21, 2016.

Si Radaza ug kaubanan nisuporta kang Mar Roxas sa LP kinsa gipilde ni Duterte sa Dakbayan sa Lapu-Lapu. (BANAT NEWS)