Kagawad gidakop
CEBU, Philippines — Usa ka barangay kagawad ang gidakop tungod sa paghupot og paltik nga armas pinasikad sa search warrant diha Sitio Kolohan Brgy. Tulay, lungsod sa Minglanilla.
Ang maong opisyal giila nga si Melchor Secuya, 53, kinsa anaa na sa iyang ikaduhang termino.
Sumala pa sa deputy chief sa Provincial Intelligence Branch nga si Senior Insp. Nazarino Emia, adunay mireklamong silingan batok ni Secuya kay nagpasalba kini og armas.
Matud pa nga usa ka buwan nilang gi-surveillance ang maong opisyal hangtud nga ilang nakompirmar nga tinuod ang mga alegasyon batok niini.
Ang search warrant giisyu ni Judge Jacinto G. Fajardo sa Regional Trial Court branch 66 sa Dakbayan sa Talisay.
Nakuha ang duha ka mga paltik nga kalibre .45 nga pistol ingon man ang mga bala niini. Apan ang konsehal miinsister nga “planted” sa iyang mga kontra partido ang maong armas.
Iyang gihimakak nga magpabuto ug manghadlok siya sa iyang mga silingan kay wala siya’y armas.
Pasakaan og illegal possession of firearms ang maong dinakpan. -/IBM (BANAT NEWS)
- Latest
