Nakatabang sa Marian procession gipasidunggan

CEBU, Philippines — Gipasidungan kagahapon sa Archdiocese of Cebu ang mga nakatabang sa kalampusan sa Grand Marian Procession niadtong Oktubre 13 nga maoy ika-100 ka tuig sa pagpakita sa Mahal nga Birhen sa Fatima sa tulo ka bata sa Portugal.

Usa ka Santos nga Misa ang gidumala ni Arsobispo Jose Palma sa Archdiocesan Shrine of San Pedro Calungsod sa Archbishop’s Palace Residence nga gitambungan sa mga opisyal sa kagamhanan, mga departamento sa kagamhanan nga nitabang sa kalihukan, mandated organizations, mga parokya ug lakip na sa mga sakop sa media. Si Palma mapasalamaton sa kalampusan sa mga dagkong kalihukan nga naglangkub sa Grand Marian Procession ug ang pagpabilin sa ka solemne sa paghaya ug paglubong ni anhing Ricardo Cardinal Vidal.

Malaumon siya nga susama gihapon ang pagtinabangay sa daghan pa nga mga dagko nga kalihukan sa Archdiocese of Cebu.

Ang pangulo sa Commission on the Laity nga si Fe Barino mapasalamaton sab sa tanang nitabang ilabi na nga unang higayon kini nga sila maoy gitahasan sa dako kaayo nga kalihukan.

Samtang ang team moderator sa Cebu Metropolitan Cathedral ug spiritual director sa World Apostolate of Fatima, Msgr. Ruben Labajo, mapasalamaton sa tanang nitabang lakip sa mga tigbalita tungod sa mga impormasyon nga gipakatap nga nakahan-ay sa kalihukan.

Nagtuo sila nga 30 mil ka tawo ang moapil sa maong kalihukan apan niabot kini og sobra sa 100,000 ka tawo.

Human sa Santos nga Misa gisunod dayon ang paghatag og pasidungog diin nalakip ang Banat News. - /GMR) (BANAT NEWS)