Planong Call Center City sa SRP daghan ang uyon

CEBU, Philippines — Daghan ang pabor sa plano ni Cebu City Mayor Tomas Osmeña nga magtukod og Call Center City diha sa South Road Properties base sa gihimo nga survey diha sa mga Business Process Outsourcing.

Si Osmeña mimando kang Nanette Garong ang pangulo sa Call Center City Program sa paghimo sa maong survey ug matud pa nga  kapin sa 3 mil ka mga call center agents gikan sa nagkalain-laing call center companies ang mitubag sa survey .

Base sa consolidated call center survey report ang 70 porsiyento niini voice agents.

Matud sa mayor 92.7 percent  ang interesado sa Call Center City Project sa siyudad tungod sa kadako og oportunidad sa mga call centers agents nga makakuha og Master’s Degree o kaha makapadayon sa pag-eskwela samtang nagtrabaho.

Nunot sa maong kalamboan gihulagway ni Osmeña nga dako ang potensiyal nga matuman ang maong proyekto diin ang tunghaan, dormitoryo ug ang call center company naa lang sa usa ka building.

Human sa survey, isunod dayon nila ang ikaduhang hugna sa proyekto nga mao ang paghimo og conceptual designs sa mga kalihukan nga gusto sa mga call center agents.

Ipakita usab sa siyudad sa mga call center agents kun unsay mamahimong hitsura unya sa call center city sa SRP ug uban pa. Human sa evaluation ug paghimo og conceptual designs nga gibana-banang mahuman sulod sa tulo ka semana, laing unom ka buwan ang itagana aron makig-estorya sa mga BPOs ug pagkuha sa ilang panahom mahitungod sa layout sa call center city nga buhaton.

“The moment we had enough people committed to the first building we start already because that’s important, once the building goes up then people will see ‘oh that’s nice, so basically we’re looking for something that will be in time for the next elections”, sigon ni Osmeña. (BANAT NEWS)