Lisensiya sa 300 ka armas ipa-renew
CEBU, Philippines — Gikatakda nga ipaubos na sa license renewal sa Camp Crame ang kapin sa 300 ka mga armas nga gipanag-iya sa kagamhanan sa Siyudad sa Sugbo nga kapin sa usa ka tuig na nga gikustodiya sa Department of General Services sa kagamhanan sa siyudad.
Nagkanayon ang pangulo sa DGS nga si Ronaldo Malacora nga karong Nobiyembre moadto siya sa Camp Crame aron pagproseso sa lisensiya sa maong mga armas.
Iduso niini ang mga dokumento sama sa license to own and possess firearms, inventory report ug certificate of availability of funds.
Sa pagkutlo niining balita, ang DGS nag-finalize pa sa lista sa mga armas nga naa sa ilang kustodiya karon.
“Ang i-renew of course kadtong naa sa atoang custody. Naa may wala mauli sa previous holder nga wala na diri sa city,” sigun ni Malacora.
Ang maong mga armas giisyu kaniadto sa mga barangay kapitan, department heads, kapolisan ug pipila ka huwes.
Apan niadtong Hulyo 15 sa niaging tuig, usa ka memorandum nga gipirmahan ni Cebu City Mayor Tomas Osmeña nagpa-recall sa mga armas tungod kay ang mga lisensya niini expired na.
Dihang gipangutana si Malacora kun dunay posibilidad nga ang maong mga armas mabalik ba sa naghupot niini kaniadto, kini niingon nga dili pa siya segurado. Sigun ni Malacora nga ang bayad alang sa renewal adto kuhaon sa DGS account. Matud pa nga ang bayad sa renewal anaa sa P3,000 ngadto na sa P4,000 matag armas. -/GMR (BANAT NEWS)
- Latest
