Nag “retouch” sa lawas ni Vidal nahibulong

CEBU, Philippines — Dili tiaw ang gibati nga kalibog ug kalipay sa usa ka attendant sa St. Peter Life Funeral Homes nga maoy nag-retouch kang Archbishop Emeritus Ricardo Cardinal Vidal.

Matud pa ni Jimielito “Jimmy” Ynoy, 38,  nga nakahinabi sa Banat News  nga lahi sa ubang mga patay nga niagi na sa iyang mga kamot.

Si Ynoy  dul-an sa 20 na ka tuig  sa iyang trabaho nga mo-retouch sa mga patay nga dili pa dayon ilubong, apan lahi ang iyang kasinatian kang Vidal.

Matud pa ni Ynoy, sayo sa buntag sa wala pa ibiyahi si Vidal padulong sa Archdiocesan Shrine of San Pedro Calungsod nipahigayon usa siya pag- retouch sa unang higayon sukad kini gihaya.

Matud niya adunay mga pari nga nagtan-aw samtang iya kining gihimo. Matud pa niya pagbukas niya sa lungon  wala gayud siyay nasinati nga baho sa medisina nga normal nilang masimhotan  ini og abli sa lungon.

Matud pa ni Ynoy susama ra man sila tanan og gigamit nga medisina sa mga patay nga ilang embalsamahon.

Gitug-an ni Ynoy, dili g’yud siya makalimot ni Vidal kay makadaghan na kining naka-misa sa mga patay nga ilang giserbisyohan ug sa maong mga higayon maka-amen gyud siya niini.

Si Ynoy, nihulagway nga mura lang og natulog ang  cardinal tungod kay malinawon ang dagway niini ug lahi sa daghan nang mga patay nga iyang na-retouch ug naserbisyohan.

Si Archbishop Jose Palma sa iyang bahin malipayon sa testimoniya ni Ynoy tungod kay iya usab kini personal nga kasinatian.

Sumala pa sa arsobispo sayod siya nga si Vidal dili lamang ordinaryong tawo susama sa uban.

Malaumon si Palma, ipadayon sa katawhan ang mga maayong gawi sa Cardinal nga gibilin niini isip legasiya.

Gitug-an ni Palma, wala pa sa ilang huna-huna karon ang paglihok alang sa tinguha nga himoong santo si Vidal tungod kay ilang gitutukan karon ang pagbayaw ni Msgr. Teofilo Camomot ngadto sa pagka santo. -/IBM (BANAT NEWS)