Mga tabako gipalusot sa jail

CEBU, Philippines — Nasakpan sa mga guwardiya sa Mandaue City Jail ang mga dahon sa tabako nga suwat unta nga gipalusot sa mga nibisita kagahapon.

Kini isip kabahin sa hingpit nga pagpatuman sa “no smoking policy” nga gipatuman ni Mandaue City Jail Warden, Senior Superintendent Renante Rubio.

Si Jail Officer 3 Merlito Zamora nga maoy desk officer on duty nibutyag nga una nilang nasakmit ang 15 ka dahon sa pinaugang tabako nga igasa unta sa bisita ngadto sa usa ka binilanggo.

Matud ni Zamora nga usa ka Jovito Ornopia, 34, taga Sitio Asinan, Barangay Mantuyong, Dakbayan sa Mandaue, ang nasakmitan og 44 ka pinaugang dahon sa tabako.

Nasakmit sab nila ang lima ka sticks sa sigarilyo gikan sa usa ka Michael Dela Cruz ug laing 20 ka sticks nga sigarilyo ang ilang nasakmit gikan sa usa ka babaye nga nibisita sa prisohan.

Si Zamora niingon nga ang maong mga dalaw nipadayag nga wala sila nasayud nga gidili ba diay ang pagdala sa naskmit nila nga mga butang maong ilang gipasaylo apan wala na lang nila pasudla alang sa ilang pagbisita. (BANAT NEWS)