Allowance sa mga tanod gibalik
CEBU, Philippines — Makadawat na og balik sa ilang allowance ang mga tanod sa Barangay Sapangdaku human nakahatag sa ilang eksplinasyon kun nganong wala sila makaduso sa ilang weekly accomplishment report sa buwan sa Septiyembre ning tuiga.
Kini maoy gibutyag sa pangulo sa Cebu City Office for Substance Abuse Prevention (COSAP) Garry Lao.
Kahinumduman nga giputol ang allowance sa mga tanod sa maong barangay, apil na sa Sambag 1 ug Lusaran sa buwan sa Septiyembre kay wala sila maka-submit sa ilang weekly accomplishment report.
Nagkanayon si Lao gipadad-an nila og suwat ang mga nahisgutang mga barangay diin ilaha kining gipangayuan og eksplinasyon ug matod pa ang Sapangdaku lang ang nisumitir.
Nakita matud pa ni Osmeña nga balido ang rason sa maong barangay hinungdan nga gibalik niini ang paghatag og allowance sa mga tanod.
“Nagpadala sila ni Mayor, ‘we’re very sorry and asking for consideration sa ilang delay sa submission for the month of September kay ang ilang mga tanods they have difficulty sa paghimo sa ilahang report unya nag-assist sad sila kay we all know in the middle of September naa man gud toy nahitabo sa Sapangdaku, more or less the Mayor nakita niya nga balido ang ilang rason so mao nga gi-restore,” sigon ni Lao.
Si Lao miingon nga mensahe kini sa tanang barangays nga kinahanglang mosunod gyud sila pagduso og weekly accomplishment report aron wala’y problema nga masugatan.
Gawas sa maong mga barangay daan na usab nga giputlan og allowance ang Barangay Poblacion Pardo, Mambaling ug Paril tungod gihapon sa maong hinungdan. (BANAT NEWS)
- Latest
