Vidal dad-on sa Pedro Calungsod Shrine
CEBU, Philippines — Dad-on karong adlawa sa alas 7 sa buntag ang patay’ng lawas ni Cebu Archbishop Emeritus Ricardo J. Cardinal Vidal sa San Pedro Calungsod Chapel sa Archbishop Residence.
Sigon ni Konsehal Dave Tumulak, Chairman sa Committee on Public Order and Safety moagi ang convoy sa dalan P. Gomez right turn sa D. Jakosalem agi sa Barangay Cogon Ramos ngadto na sa Archbishop Palace.
Ini’g alas 7 sa gabii ibalik kini sa Cebu Metropolitan Cathedral anha agi sa D. Jakosalem, right turn sa General Maxilom Avenue, right turn sa New Imus Road, Left turn sa M.J Cuenco mo-right turn sa Urdaneta Street pasulod na dayon sa Cathedral.
Sa laing bahin, gatusan ka mga batan-on ang motambong sa alas tres sa hapon nga Santos nga Misa nga pahinungod nila kang Vidal diha sa Archdiocesan Shrine of San Pedro Calungsod, Archbishop Palace nga natunong sa ikalima ka tuig nga kasumaran sa kanonisasyon ni San Pedro Calungsod.
Matud pa ni Fr. Allan Delima, Rector sa shrine makahuloganon ang pagdala sa lawas sa Cardinal kanila tungod mao man kini ang nilihok sa mga rekisitos alang sa beatification ug canonization ni Calungsod.
Aduna untay Grand Barkadahay ni Pedro Calungsod ang mga batan-on sa Commission on Youth karong adlawa apan gisibog aron moyukbo kang Vidal kinsa misuporta sa mga kalihukan sa kabatan-onan sa buhi pa kini.
Si Frank Margallo, COY Youth Coordinator miingon nga si Vidal mao ang nagsugod sa gitawag karon nga Local World Youth Day niadtong tuig 1985. Niadtong Huwebes sa gabii, emosyonal si Lingayen-Dagupan Archbishop Socrates Villegas sa iyang homiliya ug mihulagway kang Vidal nga walay kaparehas sa kamaayo og kinaiya.
Samtang gipahibalo ni Presidential Assistant for the Visayas Michael Lloyd Dino nga wala pay kasigurohan kun makaduaw ang presidente sa dili pa ilubong si Vidal apan nitug-an kini kang Archbishop Jose Palma nga nagpangutana ang presidente kun kanus-a ilubong ang cardinal. Hangyoon usab niya ang Executive Secretary aron hangyoon nga madeklarar nga holiday sa Sugbo sa adlaw sa lubong ni Vidal aron makahigayon ang mga magtutuo nga makayukbo sa katapusan nga higayon sa nitaliwan nga Cardinal. (BANAT NEWS)
- Latest
