Gustong maghikog midumbol sa sakyanan sa polis

CEBU, Philippines — Usa ka lalake kinsa giingong gustong magpakamatay ang mituyo og bangga sa iyang gimanehong cargo truck ngadto sa sakyanan sa usa ka polis niadtong Huwebes sa hapon diha sa South Road Property (SRP), habig sa Barangay San Roque, dakbayan sa Talisay.

Si SPO1 Aquiles Cabando, sa Talisay City Traffic Division nibutyag nga pulos paingon ngadto sa siyudad sa Sugbo sila si Gladys Barliso, 30-anyos nga taga Barangay Lawaan 3, dakbayan sa Talisay,  SPO1 Etelberto Timagos nga taga Barangay Poblacion, lungsod sa Barili ug Rey Ramirez, 45-anyos nga taga lungsod sa Minglanilla.

Matud ni Cabando nga nagsunod ang sakyanan nila ni Barliso, Timagos ug Ramirez.

Giingong kalit lang gidumbol ni Ramirez ang sakyanan sa polis hinungdan nga ang sakyanan sa polis midumbol usab kini ngadto sa sakyanan ni Barliso.

Si Timagos mipasangil nga gituyo gyud og dumbol ni Ramirez ang gimaneho niining cargo truck sa iyang sakyanan hinungdan nga nadumbolan usab niya ang sakyanan ni Barliso.

Dihang gihusay na sila sa traffic police kalit lang nga ni-dive si Ramirez  diha sa tunga sa karsada ug maayo na lang gani nga dali siyang nabira ni PO3 Marvin Papellero.

Ug si Vingie Boy Acosta kinsa nagbiyahe diha sa lugar nga nahitaboan niadtong higayona daling nakatunob sa preno sa iyang gimanehong sakyanan aron malikay sa pagkadasmag ngadto kang Ramirez.

Si Ramirez kinsa nakaangkon og mga pangos sa iyang lawas human siya ni-dive diha sa karsada gitanggong kini diha sa Talisay City detention cell. Si Timagos giingong mopasaka og kaso  batok kang Ramirez.

Si Ramirez sa iyang bahin, nangangkon nga nawagtangan siya og brake hinungdan nga nadumbol niya ang sakyanan nga nag-una kaniya ug iyaha usab nga giangkon nga duna siya’y problema sa iyang pamilya hinungdan nga nablangko ang iyang panghuna-huna samtang nagmaneho sa cargo truck. (Gabriel Bonjoc/BDB)

Tulo ka ilegalista sikop, usa nakigsukmagay sa polis

Usa ka 40-anyos nga lalake nasikop sa Criminal Investigation and Detection Group (CIDG)- 7  pinasikad sa warrant of arrest diha sa Barangay Mambaling, dakbayan sa Sugbo niadtong Huwebes.

Ang suspetsado giila nga si Dennis Lorella Lapa alyas  “Tete”, lumad nga taga dakbayan sa Toledo giingong nakigsinukmagay sa mga operatibang misikop kaniya.

Naimbargo sa mga operatiba gikan sa posisyon ni Lapa ang duha ka medium ug unom ka gagmay nga pakete sa gidudahang shabu ug usa ka kalibre .38 nga revolver.

Ang tigpamaba sa CIDG7 Senior Inspector Edwin Lacostales mitataw nga niadtong Hulyo 25, tuig 2016 pa miluwat og warrant of arrest ang Regional Trial Court, Branch 59 batok kang Lapa sa kasong kalapasan sa Akta Republika 9165 kon “Comprehensive Dangerous Drugs Act of 2002”. Giingong nasuta sa kapolisan nga si Lapa kaniadto sakop ni Franz Sabalones nga usa ka giingong big time drug lord. Si Lapa giingong nagtago-tago kini human makahibawo nga siya dakponon.

Si Lacostales mibutyag nga si Lapa nakigsinumbagay sa mga operatiba nga midakop kaniya.

Sa iyang bahin, si Lapa nagkanayon nga nakurat siya hinungdan nga nakigsinukmagay siya sa mga operatiba.

Si Lapa mihimakak nga kaila sila ni Sabalones ug wala usab niya angkona ang drugas ug armas ug matud usab niya nga dugay na siya nga miundang sa pagpamaligya og ginadiling drugas.

Sa laing bahin, duha ka lalake ang nasikop sa managlahi nga operasyon sa City Intelligence Branch (CIB). Kini subay sa Simultaneous Intensified Police Operations batok sa mga ilegal nga kalihukan. Sa unang operasyon niadtong Huwebes sa gabii diha sa A. Lopez, Barangay Calamba nasikop si Santiago Alegarbes, 50-anyos, residente sa maong dapit.

Naimbargo sa mga polis gikan kang Alegarbes ang usa ka .38 kalibre nga dunay duha ka buhing bala.

Si Police Senior Inspector Narrolf Tan mibutyag nga sunod nilang nasikop si Roben Palermo, 22-anyos taga Barangay Ermita, dakbayan sa Sugbo.

Si Palermo naimbargohan usab sa mga polis og usa ka kalibre .38 nga revolver nga dunay duha ka buhing bala ug 10 ka paketeng shabu nga mobalor tanan ngadto sa P5 mil base sa Dangerous Drug Board Value.  (BANAT NEWS)