P4.5B budget sa 2018 sa probinsiya
CEBU, Philippines — Nisaka og P879 milyones ang giduso nga budget sa Probinsiya sa Sugbo alang sa sunod tuig.
Si Gobernador Hilario Davide III nangayo og P4.5 bilyones nga budget gikan sa P3.6 bilyones karong tuiga. Matud ni Davide nga ang pagsaka sa gipangayo nga pundo tungod kini sa pagsaka sa share sa probinsiya sa Internal Revenue Allotment (IRA).
Nakadugang sa pagsaka sa kita sa probinsiya ang halin sa Cebu International Convention Center sa kantidad nga P300 milyones, kita sa tambalanan nga P171 milyones ug gibanabana nga surplus nga P170 milyones.
Matud ni Provincial Budget Officer Danilo Rodas nga labing dako nga budget ang 16 ka provincial ug district hospitals sa kantidad nga P1.1 bilyones.
Ang buhatan sa gobernador nangayo og P745 milyones diin nalakip ang planong pagpatukod og dormitory alang sa mga opisyal sa gobiyerno nga adunay transaksiyon sa Kapitolyo apan dili dayon makauli.
Plano usab ang pagtukod og multi-level parking sulod sa Capitol compound ug paghatag og mga sakyanan sa mga police stations ug units sa Lalawigan sa Sugbo.
Si Rodas nagkanayon nga ang ubang buhatan sa Kapitolyo sama sa engineering nangayo og P324 milyones, ang agriculture ug veterinary nangayo og P227 milyones ug ang Cebu Provincial Detention and Rehabilitation Center (CPDRC) nangayo og dugang P11 milyones sa kasamtangang P118 milyones karong tuiga. (BANAT NEWS)
- Latest
