Baha, landslide gibantayan
CEBU, Philippines — Gibantayan sa taga Mandaue City Disaster Risk Reduction and Management Office ang mga barangay nga adunay hulga sa pagbaha ug pagdahili sa yuta.
Kini tungod sa dili maayong panahon nga gipaabot nga magdala og kusog nga uwan ilabi na sa kagabhion aron matigayon dayon ang paghiklin sa mga molupyo nga anaa sa mga kuyaw nga kahimtang.
Si Felix Suico, pangulo sa CDRRMO, nipahibawo nga bukas 24-oras ang command center alang sa pagdawat og mga pahibawo gikan sa kabarangayan.
Giila ang mga barangay nga adunay hulga sa pagbaha ang Subangdaku, Tipolo, Guizo, Looc, Umapad, Basak ug Maguikay samtang ang mga bukirang bahin nga kuyaw sa pagdahili sa yuta mao ang Tawason, Tingub, Cubacub, Canduman ug Casili. Sa Dakbayan sa Sugbo, gibutyag ni Nagiel Bañacia, pangulo sa CDRRMO, nga wala pay silay nadawat nga report sa landslide nunot sa uwan sa bagyong Paolo.
Hinoon andam sila kanunay sa pagresponde kung dunay motumaw nga katalagman. (BANAT NEWS)
- Latest