PO3 Naraja gipasidunggan

CEBU, Philippines — Si Philippine National Police (PNP) Chief Director General Ronald “Bato” Dela Rosa mibutyag nga mosumiter og letter of complaint ang kapolisan batok sa usa ka pribadong tambalanan sa dakbayan sa Sugbo human gibalibaran  ang nasamdang si PO3 David Naraja nga i-admit kay walay down payment nga P10 mil.

“We will be studying the situation, kinahanglan mag-file mi og kaso, because that is a blatant violation of law kanang gibuhat nila,” si Dela Rosa miingon.

Si Naraja ang polis nga nasamdan human nakigpinusilay si Jessie Largo sa mga sakop sa Regional Special Operations Group (RSOG) sa Dakbayan sa Talisay niadtong Lunes sa hapon.

 Si Largo, usa ka notadong hitman ug most wanted sa probinsya sa Sugbo gitumbok nga suspek sa pagpusil patay sa anak sa usa ka kanhi reporter niadtong Agosto 26 niining tuiga nga si Ronli Calizar.

“What I am calling to the private hospital to give consideration to our policemen and other law enforcers na it is a result of an operation. Sana naman wag na muna kaming makarinig na magbayad muna ng 10k,” matud ni PRO-7 Director Chief Supt. Jose Mario Espino.

 Matud ni Espino alas-4 sa hapon pa napusilan si Naraja apan alas -6 na sa gabii na-admit og tambalanan.

Si Naraja gibalhin sa Cebu Doctors Universtiy Hospital, ug didto, si Dr. Potenciano Yong Larrazabal III, presidente sa maong tambalanan miingon nga 100%  libre si Naraja sa iyang pagpatambal. “I am happy nga naa tay mga polis nga ingon ana to make Cebu or not only Cebu but the rest of the Philippines safer. We owe it to him that’s why ang Cebu doctors will give 100% discount on all expenses, medicines and surgery. Kasi he will still undergo surgery eh to reconstruct his cheek kay nabuak tungod sa bala. After three days naa pa siyay laing surgery and we will take care of that also,” miingon ang maong doktor.

Kagahapong adlawa, personal nga gitaod ni Dela Rosa ang Medalya ng Sugatang Magiting kang Naraja.

 “Because we need policemen like him, nga dedicated gyud motrabaho, nga gisugal gyud iyang kinabuhi. Mao na atong kinahanglan karon.  Dili ‘tong mga pulis nga mosulod sa serbisyo para lang makakwarta,” matud pa niini.

Gibisita kagahapong adlawa nilang Cebu City Mayor Tomas Osmeña ug Talisay City Mayor Eduardo Gullas uban ni Kongresista Gerald Anthony “Samsam” Gullas Jr. si Naraja.

Si Osmeña misaad nga motabang ang siyudad sa maong polis sa mga kinahanglanon niini ug mihatag usab siya og P10 mil nga financial assistance gikan sa iyang bulsa. Si Talisay City Mayor Eduardo Gullas nagpasalamat kang Larrazabal sa pag-abaga sa tanang gastos para ni Naraja.  Si Gullas mitunol usab og P20 mil gikan sa iyang bulsa isip tabang sa iyang panginahanglan.

Samtang gihatag na ni Gullas ang P200 mil nga cash reward kagahapon sa buntag sa usa sa mga impormante nga nakatabang sa operasyon. Matud ni Talisay City Police chief Jason Villamater duha ang ilang impormante, ang usa personal nga niadto sa police station paghatag sa impormasyon samtang ang usa gipaagi lang sa telepono. Matud niya, bahala na ang duha kun unsaon nila kini pagbahin. Samtang si Mandaue City Mayor Gabriel Luis Quisumbing mipahibalo nga adto niya itunol ang P200 mil nga reward sa PRO-7 ug sila nay bahala nga motunol niini sa mga impormante. (BANAT NEWS)