Health service sa Quiot gipalambo
CEBU, Philippines — Gilusad kagahapon ang usa ka sustainable health care program sa Quiot, Siyudad sa Sugbo diin usa kini ka collaborative project sa Cebu City Government, VHC-Haarlemmermeer ug Ramon Aboitiz Foundation Inc. (RAFI). Nagkanayon ang chairman sa Cebu City Sister City Commission, kanhi konsehal Alvin Dizon, nga gawas sa P600 mil nga gihatag sa Haarlemmermeer alang pediatric ward sa Cebu City Medical Center, laing P600 mil ang gihatag alang sa Barangay Quiot.
Gustong tabangan sa Haarlemmermeer ang Barangay Quiot sa pagpalambo sa barangay health center.
Ang Quiot maoy ikaduha nga natabangan sa Haarlemmermeer diin ang una mao ang Barangay Cogon Ramos.
Gipili ang Quiot human ang RAFI nga partner sa siyudad ug sa VHC-Haarlemmermeer sa maong proyekto ang nirekomendar niini.
Si Stephan Elst, sakop sa Board sa VHC-Haarlemmermeer, niingon nga dihang nakita nila ang kalambuan nga nahitabo sa health center sa unang barangay, nakahukom sila nga motabang og laing barangay.
Sa iyang bahin, si Quiot Barangay Kapitan Francis Esparis malipayon kay dako kini og tabang sa paghatag og serbisyo sa panglawas ilabi na sa mga manganakay kay ang health center sa Quiot mahimo na nga PhilHealth-accredited.
Dili lang sab konstituwente sa Quiot ang mahimong maserbisyuhan apan lakip na mga silingang barangay.
Kagahapon sa buntag pormal nga gi-turnover ang mga medical equipment ug supplies sa Quiot ug gipahigayon sab ang pinirmahay sa Memorandum of Agreement. Giklaro ni Dizon nga ang financial assistance gihatag sa RAFI ug ang RAFI nay nipalit sa mga ekipo nga gihatag sa barangay. (BANAT NEWS)
- Latest