61-anyos naghikog
CEBU, Philippines — Patay na nga nadikubrehan ang 61-anyos nga lalaki nga gituohang naghikog pinaagi sa paghigot og pisi sa iyang liog sa Sitio Bago, Barangay Cogon, Lungsod sa Compostela alas 2 pasado sa niaging hapon.
Si Police Officer 1 Greggy Gica sa Compostela Police Station niila sa namatay nga si Crispin Cuyos Villamor, nagpuyo sa maong dapit.
Ang anak nga lalaki nga nipauli sa ilang panimalay maoy unang nakakita nga nagbitay na ang amahan sa luyo nga bahin sa ilang kusina hinungdan nga nangayo kini og panabang sa mga silingan.
Dali unta kini nga gidala sa tambalanan apan gideklarar kini nga dead on arrival.
Si Gica niingon nga ang pamilya sa namatay wala gyud nasayud sa gihambin nga problema nga maoy nakaingon sa paghikog niini.
Hinuon si Gica niingon nga ilang gitambagan ang pamilya sa namatay sa pagpaubos sa autopsy sa patay’ng lawas sa pagsuta kun may foul play ba o wala ang kamatayon niini. (BANAT NEWS)
- Latest
