Gigi Sanchez nihangyo nga pabantayan si Greco
CEBU, Philippines — Nihangyo ngadto sa gobernador ang kanhi board member nga si Grecilda “Gigi” Sanchez nga mahatagan og igong seguridad ang iyang igsoon nga si Leodegreco “Greco” Sanchez nga nabilanggo karon sa Cebu Provincial Detention and Rehabilitation Center (CPDRC).
Nabalaka siya nga initan si Greco ug makulatahan sa mga kaubang priso human nga nasuspenso ang dalaw sa mga piniriso human nakuhaan og cellphones. Si Greco gibartolina tungod niini.
Si Sanchez didto sa buhatan ni Gobernador Hilario Davide III kagahapon aron pagpasabot sa isyu human sa nahitabong pagsuspenso ug pakig-estorya niya kang Bobby Legaspi kinsa membro sa CPDRC task force.
Si Sanchez misugyot nga angay nga butangan na gyud og social worker ang CPDRC aron pag- tabang sa rehabilitation sa mga priso sa CPDRC.
Si Bise Gobernador Agnes Magpale kinsa nagkanayon nga anaa na kini sa CPDRC manual nga giaprobahan sa provincial board ang pagbutang og social worker sa sulod.
Si Magpale nakasabot nga dako ang papel sa usa ka social worker ngadto sa mga priso hilabina pag-abot sa rehabilitasyon niini. Ang CPDRC adunay 3, 500 ka mga piniriso. (BANAT NEWS)
- Latest
