Banat ( Leaderboard Top ), pagematch: 1, sectionmatch: 1

Basura sa barangay gitambak sa fish port

CEBU, Philippines — Gipatubag sa Cebu City Environment and Natural Resources (CCENRO) si Suba Barangay Captain Joel Sable Jr. kalabot sa giingong illegal dumping nga gihimo sa barangay sa bakanteng luna duol sa Pasil Fish Port.

Matud sa pangulo sa CCENRO Nida Cabrera nahibaw-an nila ang maong kalihukan pinaagi sa social networking site nga Facebook diin  usa ka post nga gi-tag siya ug nakuhaan og hulagway hinungdan nga ilaha dayon kining gisusi.

Sigon ni Cabrera nahibaw-an nila ang basura nga gilabay sa bakanteng luna duol sa Pasil Fish Port gikan sa barangay ug dihang nahinabi nila ang driver sa truck nga nakit-an sa Facebook giingong ang driver miingon nga kini gisugo sa kapitan.

Kini maoy rason nga nagpadala og suwat ang CCENRO kang Suba Barangay Captain Joel Sable Jr., aron pagtubag sa giingong illegal dumping nga supak sa balaod.

Si Cabrera miingon base na sa Republic Act 9003 Ecological Solid Waste Management Act dunay responsibilidad ang local government units paghipos sa basura ug dili paglabay bisan asa. Niadtong Oktubre 9 gipadala sa CCENRO ang suwat kang Sable ug gihatagan nila kini og 10 ka adlaw pagtubag niini.

Gi-copy furnished sab sa CCENRO ang Office of the Ombudsman, Environmental Management Bureau (EMB) Basura Patrol ug ang Department of Public Services (DPS) aron masayod mahitungod niini.

Si Cabrera miingon bag-o lang gyud sila nag-orientation sa mga barangay ug 16 na ang nahuman na nila nga gipahigayunan og refresher course uban sa Ombudsman, DILG ug EMB aron masayod ang mga barangay sa ilang mga kaakohan  pag-atiman sa basura.

Si Cebu City Mayor Tomas Osmeña sa iyang bahin miingon nga daghan og trak ang siyudad nga maoy mohakot sa mga basura nga ipanglabay ug iyaha nang gitugyan kang Cabrera ang maong insidente.

Gisuwayan og kuha sa Banat News ang habig ni Sable pinaagi sa text ug tawag sa telepono niini apan dili kini ma-contact. (BANAT NEWS)

  • Follow Us: