Pag-apil ni Ong gikwestyon
CEBU, Philippines — Gikwestiyon ni Konsehal Raymond Garcia sa Barug Team Rama ang transaksiyon ni Kasambagan Barangay Captain Franklyn Ong isip service provider sa siyudad sa Sugbo.
Kini human nabantayan ni Garcia nga si Ong nga maoy tag-iya sa Pasajero Motors Corporation nakigtransaksiyon sa siyudad bisan og usa siya ka barangay official.
Isip usa ka abogado ug kanhi Chairman sa Committee on Laws, Ordinances and Styling nagtuo si Garcia nga usa kini ka gross violation sa Anti-graft and Corrupt Practices Act.
“I want to know if there is really a violation, I want to look and see kinsa gyud ang tag-iya. Dili man pwede you engaged business in the city if you are a barangay captain,” sigon ni Garcia.
Sigon ni Garcia iyahang ipaabot ang maong hisgutanan sa konseho aron sutaon unsa kining mga transaksyon ni Ong sa siyudad. Si Ong nailhan nga kaalyado sa Bando Osmeña Pundok Kauswagan (BOPK).
“Wala may balaod preventing barangay officials to engage business sa city hall. Naa bay provision? Ipa-cite niya kay bisan sukad sa una, naa may daghang kapitan ni-engage sa city hall. Karon pa man ko nakadungog ana iyahang gisulti,” hagit pa ni Ong kang Garcia. Matud ni Ong sa matag transaksiyon niya sa siyudad sa Sugbo nisubay siya sa Republic Act 9184 kon Government Procurement Reform Act.
Samtang si Cebu City Mayor Tomas Osmeña miingon nga wala’y nalapas nga balaod si Ong sanglit naka-comply man kini sa bidding requirements ug nakabentaha gani hinuon ang siyudad niini kay adunay nagkompetinsya sa kontrata.
“Simple kaayo na but it is advantage to the city that there’s competition and you cannot say I gave him favor because napildi man siya sa bidding (P124 million hauling contract),” asoy pa ni Osmeña.
Nagkanayon usab ang pangulo sa Bids and Awards Committee Ronaldo Malacora nga ang Pamocor mituman sa tanang bidding requirements ug gipasalig niini transparent ang matag transaksiyon niini sa siyudad.
Ang Pamocor maoy nakadaog sa bidding sa P55 million nga rental contract nga naglangkob sa 10 ka units sa compactor trucks ug 11 ka units sa dump trucks nga mag-operate 24 oras, sila maoy pinakaubos og presyo nga P700 matag oras nga abang itandi sa Jomara Konstruckt Inc. nga nitanyag og P823. (BANAT NEWS)
- Latest
