Dokumento sa Pamocor gisusi sa TWG

CEBU, Philippines — Gitun-an karon sa Cebu City Technical Working Group ang giduso nga dokumento sa Pasajero Motors Corporation (Pamocor) human nga maoy lowest bidder atol sa public bidding sa P55 milyones nga rental contract sa mga heavy equipment.

Nagkanayon ang pangulo sa Bids and Awards Committee, Ronaldo Malacora, nga base na sa proseso ang TWG, mo-evaluate una sa mga dokumento sa kontraktor nga nitanyag sa labing ubos nga presyo.

Matud niya nga duha lang ka suppliers ang niapil sa public bidding diin gawas sa Pamocor, ang laing bidder mao ang Jomara Konstruckt Incorporated.

Dili pa hinoon makabutyag si Malacora kun pilay gitanyag sa Pamocor sa siyudad sanglit nagpadayon pa man ang post-qualification diin gi-review sa TWG ang tulo ka klase sa dokumento sama sa technical, legal ug financial.

Nagkanayon si Malacora nga ang post-qualification molanat og tulo ngadto sa lima ka adlaw.

Ang P55 milyones gamiton kini sa pag-abang sa mga trucks nga naglangkub sa 10 ka units sa compactor trucks ug 11 ka units sa open dump truck. (BANAT NEWS)