Ihatag ni Tom gihangop sa CCPO
CEBU, Philippines — Gipadayag sa Deputy City Director for Administration sa Cebu City Police Office, Supt. Artemio Ricabo, nga dako ang matabang sa ihatag nga usa ka milyon ka pesos nga balor sa kagamitan sa polis ni Mayor Tomas Osmeña ngadto sa Police Station 2.
Matud ni Ricabo nga makapadasig kini sa mga hepe sa tagsa-tagsa ka estasyonan sa polis sa CCPO nga mopadayon ug mopahugot sa ilang kampanya batok ilegal nga drugas, kriminalidad ug uban pa.
“Maningkamot pud ang atong mga station commanders nga makakuha pud sila og suporta ug pagdayeg pud. Tanan man nag-effort, ang station two lang gyud nga nakita niya nga mas labaw ang effort. Makita man sad sa atong mga accomplishment. Halos tanan naa man gyuy buhat,” matud ni Ricabo.
Mga butang sama sa radio alang sa komunikasyon, mga flashlights, rubber shoes ug uban pa ang ihatag ni Osmeña sa Police Station 2 nga gipangulohan ni Chief Inspector, Atty. Maria Theresa Macatangay. (BANAT NEWS)
- Latest
