Force multipliers subling gibansay

CEBU, Philippines — Gipaubos og pagbansay ang mga force multiplier sa Cebu City Police Office kagahapon aron pagsumpo sa kriminalidad sa nagkadaiyang barangay.

Gitawag ang maong grupo sa mga force multiplier nga Crime Watchers In Action.

Ang hepe sa Cebu Intelligence Branch nga si PCInsp. Christopher Navida nibutyag nga dako ang naabag sa maong grupo ilabi na kabahin sa pagsubay ug pag-ila sa mga durugista ug uban pang mga notadong kriminal sa ilang tagsa-tagsa ka mga lugar. “Pagbibigay din ng lead sa kapolisan ay sa kanila din nag-originate. Napakahalaga ng role nila sa Cebu City Police Office,” butyag pa ni Navida. Tungod sa kakuwang sa mga polis, dako sila og tabang kon adunay mga dagkong kalihukan nga ipahigayon sa Dakbayan sa Sugbo. “Sa nakalipas na big events like ASEAN Summit, Sinulog… sila yung ni-utilize natin. Considering na kulang ang polis para maging maayos at matiwasay. Sa mga checkpoint din may mga force multiplier,” dugang sa hepe sa CIB.

Adunay kapin sa 300 ka sakop ang force multipliers sa siyudad ug pipila gikan sa probinsya nga naghupot og nagkadaiyang mga propesyon.

Laing gibutyag ni Navida nga dili basta-basta makasud sa maong grupo kay i-background check ang matag usa kanila aron masiguro nga dili sab sila mga kriminal. Dugang niini nga aron dili maabuso sa maong grupo ang gahum nga gihatag kanila sa kapolisan, aduna sila’y handler nga mga hepe sa nagkadaiyang police stations. “Most of them have their own works. Every Saturday ang pagkakaroon ng seminar para ma-educate sila,” dugang ni Navida. (BANAT NEWS)