Humps gitaod batok sa mangrakrak sa TCJ

CEBU, Philippines — Tulo ka  mga tag-as nga humps sa karsada padung sa Talisay City Jail sa Barangay Maghaway ang gibutang aron magsilbing proteksyon ug pang-delatar sa mga tawong gustong magbinuang batok sa maong pasilidad.

Una niini, ang TCJ girapido sa wala pa gihapon mailhing mga responsable duha ka higayon sa nakalabay nga duha ka bulan. Base sa impormasyon sa mga otoridad bahin sa maong duha ka mga pagpangrakrak klaro kaayo nga pagpanghasi lamang ang tumong niini.

Daan nang nagduda si TCJ Jailwarden Supt. Gil Inopia nga ang maong duha ka insidente bawos sa mga ilegalista diha kanila tungod sa adlaw-adlaw nga pagpahigayon og greyhound operations sa mga selda aron embargohon ang mga kontrabando sama sa ilegal nga drugas.

Matud pa ni Inopia nga ilang nasabutan nga butangan ang karsada og humps duol sa ilang buhatan aron ang mga motorista mapugos gyud magpahinay sa ilang sakyanan samtang moagi.

Siya niingon nga mao kini ang ilang nakita nga maoy tubag nga dili na madali-dali ang ilang buhatan nga rakrakan sa mga tawo nga naglagot kanila.

Gawas sa hump gidungagan na usab ang ilang CCTV cameras aron makita gyud ang mga dagway sa mga tawo nga aduna’y dautang tinguha sa ilaha.

Hapit na sab palibotan sa TCJ ug net ang ilang prisuhan aron masawod ang mga butang nga ipalusot sa mga taga gawas ngadto sa mga piniriso pinaagi sa pag-itsa lang niini diha sa ilang perimeter fence. (BANAT NEWS)