P250K shabu nasakmit, jeepney driver sikop
CEBU, Philippines — Nikabat sa P177 mil ang balor sa shabu nga nasakmit gikan sa tulo nga nadakpan sa Sitio Kamalig, Labangon, Dakbayan sa Sugbo niadtong Huwebes sa hapon.
Ang mga dinakpan kinsa bag-ohay lang nailhang mga durugista giila nga sila si Narciso Ruiz Belen, 29; Carlo Fuentes Gecain, 21, ug Jason Mediana Elasion, 21.
Nakuha gikan sa tulo ang duha ka gagmay’ng pakete ug tulo ka medium nga pakete sa gidudahang shabu nga motimbang tanan og 15.08 ka gramos. Nakuhaan sab sila og nagkadaiyang drug paraphernalia. Kasong paghupot og ilegal nga drugas ang ipasaka batok sa mga dinakpan.
Samtang dul-an sab sa P80 mil nga balor sa ginadiling drugas ang nasakmit sa mga sakop sa City Drug Enforcement Unit sa Lapu-Lapu City Police Office atol sa gipahigayon nilang managlahi nga buy-bust operation sa Barangay Ibo, Agus ug Gun-ob kagahapon sa kadlawon.
Unang gisuhid sa CDEU-LLCPO nga gipangulohan ni Police Senior Inspector Genesis Aniversario alas 12 sa kadlawon mao ang Sitio Relocation Site, Ibo diin nasikop si Brian Rey Lesaca, 20, kinsa nasakmitan og siyam ka pakete sa gituohang shabu.
Gisundan ang maong operasyon sa may Barangay Agus diin nasikop ang manag live-in partner nga sila si Christine Mae Navales, 24, ug Juniel Sungahid, 26, kinsa nasakmitan ang duha og 13 ka gagmay nga putos ug usa ka medium-size sa gituohang ilegal nga drugas.
Dugang ni Aniversario nga nasakmitan sab nila si Sungahid og usa ka .9mm Black Widow revolver ug usa ka .45 caliber nga armas.
Katapusang operasyon nasikop mao si Christopher Languido, 35, usa ka jeepney driver.
Nasakmit gikan sa dinakpan ang P6,000 nga gituohang halin sa ilegal nga drugas ug napulo ka gagmay nga putos sa shabu. Nagtingkagol na karon sa lock up jail ang mga dinakpan samtang giandam ang pagsang-at sa tukmang kaso. (BANAT NEWS)
- Latest
