Negosyante’g isda sikop sa shabu

CEBU, Philippines — Sikop ang usa ka 58-anyos nga negosyante og isda atol sa buy-bust operation sa Barangay Lambug, Badian kagahapon.

Ang suspek giila nga si Antonio Gomez Pimentera.

Sumala pa ni Senior Insp. Nazarino Emia, deputy chief sa Provincial Intelligence Branch (PIB), nga gihimo ang operasyon batok sa suspek sa mga operatiba sa Provincial Drug Enforcement Unit.

Human nga nakuhaan og duha ka dagkong pakete sa gituohang shabu ang dinakpan, gisilbihan dayon sa mga operatiba sa PIB sa search warrant nga pinirmahan ni Judge Jerry Dicdican sa Regional Trial Court Branch 25 sa Dakbayan sa Danao.

Nunot niini, nakasulod ang mga operatiba sa panimalay sa dinakpan sa Barangay Dagatan ug napalgan ang laing duha ka dagkong pakete sa gidudahang shabu, usa ka KG9 nga armas nga walay lisensya, mga bala sa shot gun ug pipila ka drug paraphernalia.

Matud ni Emia nga mobalor og P118 mil ang shabu nga nakuha sa mga operatiba sa PIB.

Gibutyag ni Emia nga nalakip sa listahan sa high-value target sa Cebu Provincial Police Office (CPPO) ang dinakpan.

Ang suspek ang giingong tig-supply og drugas sa Lungsod sa Moalboal ug Dakbayan sa Toledo.

Matud pa nga sa New Bilibid Prison ang tinubdan sa shabu nga gipamaligya sa maong dinakpan.

Giingong aduna kini koneksiyon sa barangay kapitan sa Malbago, Badian nga si Epifania Divinagracia Alvizo kinsa una nang nadakpan sa Philippine Drug Enforcement Agency niadtong Hulyo.

Nakuhaan si Alvizo og kapin usa ka milyon ka pesos nga balor sa shabu. Kasong paghupot og ilegal nga armas, ug paghupot ug pagpamaligya og ilegal nga drugas ang kasong ipasaka batok kang Pimentera. (BANAT NEWS)