Nibalibad og pasahero gireklamo

CEBU, Philippines — Usa ka taxi drayber nga nibalibad og pasahero ug namili hinuon og langyaw nga maoy pasakyon atol sa pagbunok sa uwan gireklamo sa kanhi kapitan sa Barangay Zapatera ug kasamtangan nga anchor sa DyRF sa Programang Kasikas sa Barangay, Francisco “Frank” Benedicto ug ni Yolly Rapana.

Ang duha miduol sa Land Transportation and Franchising Board-7 ug misumbong batok sa drayber sa Molave Taxi nga dunay plate number AEC-7039 nga gimaneho ni James Bacalla.

Sumala pa ni Benedicto dihang ilaha kining gipara gibalibaran sila niini kay giingong mogarahi na kini. Si Benedicto mipahimangno daan kang Bacalla nga gikuhaan na siya niini og hulagway ug gisultihan nga di na siya angay mamasahero kun mogarahi na.

Apan giingong miabante lang si Bacalla sa unahan ug dihang gipara og mga langyaw gipasakay niya kini hinungdan sa kasagmuyo sa kanhi barangay kapitan.  Gusto ni Benedicto nga pamultahon sa LTFRB si Bacalla tungod kay nakalapas kini sa iyang prangkisa pagpili og pasahero.

Si Bacalla kinsa gipatawag sa LTFRB miangkon sa iyang sayop tungod kay nangyawat siya og pasahero. Siya nangrason nga gikinahanglan niya og kwarta kay operahanan ang iyang anak sa sakit sa bato ug nangayo siya og pasaylo sa iyang nahimo.

Giangkon ni Bacalla nga naleksyon gyud siya sa iyang nahimo ug niawhag sa ubang mga drayber og taksi nga dili na lang mangyawat kay mas dako pa man ang iyang nabayran sama sa nahitabo kaniya.

Ang LTFRB niisyu og Temporary Operators Permit kang Bacalla tungod sa pagbalibad niya sa pasahero. Sumala pa ni Jun Tumulak ang tigpamaba ug precision specialist sa LTFRB dili angay mamentaha ug mopahimulos ang mga taxi driver ilabi na kung lain ang panahon.

Siya midugang nga kun mogarahe na gani dili na gyud angay nga mokuha pa og pasahero. Matud niya ang prangkisa obligasyon sa drayber nga moserbisyo sa katawhan.

Gitug-an ni Tumulak gikan sa Septiyembre 18 hangtod kagahapong adlawa  aduna na silay nadawat nga mga reklamong tulo ka refuse to convey, duha arrogant/discourteous, tulo overcharging, usa contracting (namakyaw), duha reckless driving, ug usa trip cutting. Human sa panag-abot nila ni Benedicto ug Bacalla, nipasalig ang kapitan nga mangita og pamaagi aron matabangan sa problema sa anak niini. (BANAT NEWS)