Dino gituohang nagpaluyo kang Renato Osmeña

CEBU, Philippines — Si Cebu City Mayor Tomas Osmeña nagtuo nga si Presidential Assistant for the Visayas Michael Dino gusto gyud modagan pagkamayor sa siyudad sa Sugbo.

Dihang gipangutana ang mayor kun nganong iyaha kining nasulti, kini miingon nga tungod kay brother-in-law ni Dino si Renato “Junjun” Osmeña.

Kahinumduman nga si Junjun Osmeña maoy gi-nominate sa Barug Team Rama nga mohulip sa posisyon sa mi-resign nga si councilor Atty. Nendell Hanz Abella.

Gihulagway sa mayor nga ang main agenda ni Dino mao nga iyang mga Singaporean friends ang makakuha matud pa sa Light Rail Transit (LRT).

Asoy ni Osmeña giingong nakig-estorya si Dino sa mga kongresista ug mga senador ug giingong nagsalig kini sa Department of Transportation (DOTr) aron mapugngan ang Bus Rapid Transit (BRT) Project.

Gitubag usab sa mayor ang pasangil sa Barug Team Rama nga giingong nakigkita kini kang Senator Nancy Binay alang sa endorsement sa ilang kaalyado sa Bando Osmeña Pundok Kauswagan (BOPK).

Si Osmeña miingon nga miadto siya sa senado tungod sa mga ‘secret mission’ apan dihang gipangutana kun may kalabot ba niini si Rengelle Pelayo nga matod pa maoy ilang gi-endorso, wala na mokomento ang mayor.

“I went to the senate I saw all of them I did not go to her (Binay). I went to the senate because the senate acknowledge my presence so everybody went to me practically all of them,” sigon sa    mayor.

Apan ang Barug Team Rama  councilors miingon nga wala’y kalabotan si Dino kang kanhi Vice President Jejomar Binay nga maoy Chairman sa United Nationalist Alliance (UNA) tungod kay ang gisuportahan ni Dino si Presidente Rodrigo Duterte. (BANAT NEWS)