DyCM gireklamo sa brodkaster

CEBU, Philippines — Laing sibyaanan sa radyo ang nag-atubang og reklamo sa buhatan sa National Labor Relations Commission samtang gisaulog karon sa Cebu media ang Press Freedom Week ug Broadcaster’s Month.

Si magsisibya Isabelo Mirasol Osmeña, Sr., nga naila nga Rico Osmeña ang nipasaka og reklamo batok sa DyCM nga gipanag-iya ug gidumala sa politiko nga pamilyang Martinez sa Dakbayan sa Bogo.

Kini nunot sa giingong ubos sa minimum ang sweldo ug wala pagbayad sa Social Security System, PhilHealth ug Pag-IBIG Fund premiums, ug illegal dismissal.

Matud ni Osmeña nga dili lang alang sa iyang kaugalingon ang iyang gisang-at nga reklamo kun dili apil na sa kapin 20 pa ka kauban niya nga kawani sa sibyaanan.

Sayo niining buwana, duha sab ka technicians sa DyRC ang nisang-at sa susamang reklamo sa NLRC.

Gisukip ni Osmeña ang kopya sa mga payrolls ug cash voucher sa buwan sa Agosto 2017 diin nagpakita nga P5,000 ra ang iyang sweldo sa usa ka buwan.

Hulyo 11, 2017 gimanduan sa general manager sa DyCM, Maria Clavel M. Herrera, si Osmeña pinaagi sa memorandum nga mokuha og balita gikan sa general beat gawas sa Bureau of Customs ug mohatag og walo ka balita sa buntag ug unom sa hapon alang sa mga station produced programs.

Si Osmeña gipahunong sab sa station manager nga si Jasonjes Monteclar sa pagdumala sa programa nga binayran sa Kapitolyo niadtong Agosto 31, 2017 gumikan sa giingong kalapasan sa Broadcast Code.

Niadtong Hulyo 12, 2017, si Osmeña ug kaubang magsisibya nga si Arnel Bacalan sa DyRC ang nisang-at sab og reklamo batok ni Monteclar sa buhatan sa Ombudsman gumikan sa paglingkod niini isip Public Information Officer sa Kapitolyo ug sa samang higayon station manager sa DyCM diin dunay binayran nga programa ang Kapitolyo. (BANAT NEWS)